Gisteroggend is ons by die mall. Nie my gunsteling mall nie, die ander groot verwarrende een. Wanneer ek instap voel dit asof ek binne in n byekorf beland het.
Ons stap nog aan na deur toe toe is dit hordes mense, karre, toeters, musiek van iewers af doef-doef-doef. My siel begin liggies vibreer.
Ons stap in en dis net mense oral… stroewe gesigte, lippe getuit, leepoog. Dis nie kersfees of maandeinde nie, dis die derde week van die maand, mens draai selfs die snytjie brood twee maal om voor jy hom liggies smeer. Maar hier is almal nou.
Ons soek vir jongste n paar skoene. Baie spesifieke skoene, size 11 of 12. Stap by die sportwinkel in, no luck. Vra vir n verkoopsdame waar ons nog kan kyk. Ek moet net eers wag tot sy klaar gegaaaaap het. Ons moet by die deur uit en dan draai – die lippe sê links en die vinger wys regs. Dan sal ons n kleiner tak van dieselfde sportwinkel kry. Reg oorkant ons grootste koswinkel in geel en rooi getooi.
Ons stap uit en draai toe regs en stap 3 km in die doolhof. My fitbit vibreer en klap hande met n boodskap wat flits “great workout”… 2 maal!!! Ek sweet bietjie.
Net toe ons wil moed opgee kry ons die 2de kleiner tak van die sportwinkel. Met die instap vang my oog die ingang van n ander klerewinkel en my kakebeen slaan die teëlvloer. Dis die winkel skuins oorkant sportwinkel 1. As ons net links in plaas van regs gedraai het sou ons net 200m geloop het. By die winkel ook no joy. Nommer 11 of 12 skoene is skaars. Ek vra of die dame vir my kan bel en uitvind by die winkel se tak in die 2 ander malls. Sy kyk vir my asof ek n onwelvoeglike voorstel gemaak het en ons loop maar.
Later beland ons toe wel by my gunsteling mall, die een met die breë gange. Die mense hier stap stadiger en glimlag selfs nou en dan. Hier kry ons ook geen skoene nie maar die verkoopsdame bied aan om vir ons te soek. Kom terug, jammer geen skoene in die grootte in die hele Ooskaap nie.
Ons moet maar online probeer.
Sy kyk wel vir jongste op en af met n glinster in die oog…