Daar was laasnag n aanslag op my lewe…. baie dramaties! Gelukkig is ek nog hier om my verhaal te vertel.
Ek is in die greep van n somer verkoue. Gistermiddag net na werk vat ek n ligte nap-attizer om van my hoofpyn ontslae te raak. Dit het toe die effek dat ek verby my gewone slaaptyd nog kombuis skoonmaak en tee drink.
Jaco het meeste van sy dag daaraan spandeer om my te help met n probleem op my rekenaar. Terwyl ek toe in die kombuis woel gaan vat hy n pre-sleep powernap.
Ons onderskeie ruskansies, die verkoue medikasie en die feit dat die somer se eerste ligte hitte ons getref het werk alles saam om ons slaapskedule effens deurmekaar te krap.
Alles het tot gevolg dat ons 2 uur vanoggend se kant tee drink – en nee dis nie n kode woord vir enigiets anders nie! Tee is gedrink en ons kom weer tot ruste.
Iewers tussen indommel en wekker tyd slaap ek salig half op my sy/half op my maag… – skielik word ek uit my slaap geruk deur iemand wat my aan my agterkop beet het en my gesig met mening deur die matras probeer druk!
Baie verward probeer ek myself teësit en verdedig – ons het nog nie n karate blok vir die situasie geleer nie en ek sukkel nogal. Die volgende oomblik word die greep op my kop verlig en my aanvaller lag kliphard dat die hele bed skud.
My slaapnewels verdwyn en die “where’s my fudge” lyn verskyn tussen my oë. Ek sit regop, draai om en kyk in Jaco vas wat homself breek vir iets.
Sy verduideliking… hy was besig om in n droom n yslike spinnekop te probeer vermorsel…. that’s his story and he’s sticking to it!